ہنگام سحر مطلع انوار میں گم ہے

 عارفانہ کلام حمد نعت منقبت

ہنگامِ سحر، مطلعِ انوار میں گم ہے

خورشید، ترے جلوۂ رخسار میں گم ہے

انجم ہیں ترے نورِ تبسم پہ نچھاور

مہتاب ترے حسن کے دیدار میں گم ہیں

کیا پنچۂ قدرت نے سنوارے ہیں ترے بال

شب گیسوئے واللیل کے اسرار میں گم ہے

صدیوں سے گلوں کا ہے وظیفہ تری خوشبو

جنت بھی ترے جسم کی مہکار میں گم ہے

اعجازِ سخن پر ہیں فدا اہلِ فصاحت

ہر نطق تر ے حرفِ ضیا بار میں گم ہے

ہے محوِ طوافِ شہِ خوباں دلِ کعبہ

محرابِ حرم، ابروئے خمدار میں گم ہے

حیرت زدہ ہے ساعتِ اسریٰ پہ زمانہ

صدیوں کا سفر اک دمِ رفتار میں گم ہے

ہر تخت ہے تیرے قدمِ ناز کا صدقہ

ہر تاجِ شہی، شوکتِ پیزار میں گم ہے

ہر گوہرِ فطرت ہے تیرے نور سے تاباں

آفاق، ترے قلزمِ اظہار میں گم ہے

کیا کہیے ترے گلشنِ معنیٰ کا تجمُّل

فردوسِ حِکم، غنچۂ گفتار میں گم ہے

اعلیٰ ہے زمانے میں ترا شہرِ تمدُّن

ہر دور ترے دور کے معیار میں گم ہے

سیفی! ہے مے نعت مرے جامِ سخن میں

آہنگِ غزل، مستئ اشعار میں غم ہے

شاکر حسین سیفی