خود اپنے آپ سے آگے نکل نہیں سکتا

 خُود اپنے آپ سے آگے نکل نہیں سکتا

اب اس قدر بھی کوئی تیز چل نہیں سکتا

کبھی خزاں کا ہے موسم کبھی بہار کی رُت

میں روز روز یہ کپڑے بدل نہیں سکتا

شجر کی شاخ تراشی بہت ضروری ہے

جو زخم زخم نہیں ہے وہ پھل نہیں سکتا

ملاپ ہو گا ہمارا کسی سمندر میں

الگ الگ ہو جو دریا بدل نہیں سکتا

اُگا ہوا ہے مِری ہر چٹان پر سبزہ

ہوں وہ پہاڑ جو لاوہ اُگل نہیں سکتا

بُجھائے کیسے کوئی آنکھ روشنی کی پیاس

مِرے چراغ سے چشمہ اُبل نہیں سکتا

وہ لے گیا ہے صفی کاٹ کر مِرا بازو

خسارا ایسا ہے میں ہاتھ مل نہیں سکتا

سفیان صفی