ماں بھلا کیسے تِرا پیار بھلا پاؤں گا

 ماں بھلا کیسے تِرا پیار بھُلا پاؤں گا

کیسے ممتا کا وہ اظہار بھلا پاؤں گا

بدلہ چاہت کا تِری کون چُکا سکتا ہے

کون بدبخت تجھے دل سے بھلا سکتا ہے

رات بھر جاگ کے سینے سے لگائے رکھنا

خود نہیں سونا، مگر بچہ سُلائے رکھنا

میں تِری چھاؤں تلے اوجِ ہُنر تک پہنچا

یعنی پودا تِری محنت سے شجر تک پہنچا

بزمِ امکاں میں، خیالوں میں کہیں کوئی نہیں

تیرا ہم سر ہو کوئی اور؟ نہیں، کوئی نہیں

پوچھتا جب ہے کوئی کیا مِرا سرمایہ ہے؟

تو میں کہتا ہُوں فقط ماں کا مِری سایہ ہے

اُس کو ہر رنج سے ہر غم سے بچا لے مالک

میری سب عمر مِری ماں کو لگا دے مالک

اس کا سایہ مِرے سر پر سدا قائم رکھنا

اس دُعا کو مِرے مالک تُو مقدم رکھنا

اطہر علی