دل میں یاد تیری آنکھوں میں نور تیرا

 عارفانہ کلام حمد نعت منقبت

دل میں یاد تیری آنکھوں میں نُور تیرا

جس گھر کو میں نے دیکھا پایا ظہور تیرا

جلوہ تِرا عیاں ہے پستی ہو یا بلندی

پھُولوں میں بُو ہے تیری تاروں میں نور تیرا

یہ سر تِرے قدم پر یوں ہی پڑا رہے گا

جب تک نہ تُو کہے گا بخشا قصور تیرا

گردن جھُکانے میں بھی کیا سربلندیاں ہیں

پایا مراقبے میں اکثر حضور تیرا

کہتا ہوں صدق دل سے دونوں کو خوشمنا ہیں

مجھ کو تو عجز میرا تجھ کو غرور تیرا

اپنی رگِ گلو سے پایا قریب تجھ کو

غفلت یہ تھی کہ رستہ سمجھے تھے دور تیرا

اپنے کرم کے صدقے محشر میں بخش دینا

ہے اک ذلیل بندہ شوق اے غفور تیرا

شوق نیموی