اس بات کو بھولیں نہ مسلمان خدا کے

 اس بات کو بھولیں نہ مسلمان خُدا کے

کافر بھی حقیقت میں ہیں انسان خدا کے

وہ کون ہے جس کو نہیں کچھ اس سے شکایت

وہ کون ہے جس پر نہیں احسان خدا کے

بڑھتا ہی چلا جاتا ہے دُنیا میں تعصب

بنتے ہی چلے جاتے ہیں ایوان خدا کے

جلتی ہیں بہر حال گُناہوں کی سزائیں

کرتے رہیں ہم کتنے بھی گُن گان خدا کے

دُنیا تو حقیقت میں ہے اک رَین بسیرا

ہم سب تو ہیں کچھ وقت کے مہمان خدا کے

مر کر بھی ضروری نہیں پائیں گے رہائی

دُنیا کے علاوہ بھی ہیں زِندان خدا کے

پرواز کبھی غور سے یہ بات بھی سوچیں

اک بار بھی کام آیا ہے انسان خدا کے؟

درشن دیال پرواز