اس دل خوش گماں سے اٹھتا ہے

 اس دلِ خوش گُماں سے اُٹھتا ہے 

درد ہر پل یہاں سے اٹھتا ہے 

آگ گھر کے دِیے سے لگتی ہے

یہ دُھواں ہر زباں سے اٹھتا ہے 

لوگ پہروں جگہ وہ تکتے ہیں

میرا ساجن جہاں سے اٹھتا ہے

ہونٹ چُپ ہیں، مگر میرے اندر

شور جانے کہاں سے اٹھتا ہے

شور سُن کر لگے ہے ڈر مجھ کو

وہ جو آہ و فغاں سے اٹھتا ہے

اب گِلہ کیسے ہو کسی سے جب 

فتنہ اپنے مکاں سے اٹھتا ہے

تاب ریحانہ میں رہی کب ہے؟

بوجھ کب ناتواں سے اٹھتا ہے 

ریحانہ اعجاز