سایۂ عشق نبی دل پہ پڑا اچھا لگا

 عارفانہ کلام حمد نعت منقبت

سایۂ عشقِ نبیﷺ دل پہ پڑا، اچھا لگا

ہوں محمدﷺ کے غلاموں میں، بڑا اچھا لگا

بے خودی میں بھی مِرے دل کو ہے رحمت کا پتہ

درِ آقاﷺ پہ، یہ مجذوب کھڑا اچھا لگا

شوقِ دیدار میں پلکوں پہ لرزتا ہوا اشک

اُنؐ کی چوکھٹ پہ نگینہ یہ جڑا، اچھا لگا

مِدحتِ پاک کہاں ہوتی، بجز عشقِ نبیﷺ

عشق کا تیر مِرے دل میں گڑا، اچھا لگا

تھا کرم جوش میں ایسا کہ مِرے دامن میں

باغِ رحمت سے شگوفہ جو جھڑا، اچھا لگا

اب کے چوکھٹ سے یہ دل اُٹھ کے نہیں جانے کا

میرے آقاﷺ کو بھی یہ ضد پہ اڑا اچھا لگا

سینت رکھا ہے مدینے کی حسیں یادوں کو

دل کے حُجرے میں، خزانہ یہ پڑا اچھا لگا

نسرین سید