عارفانہ کلام حمد نعت منقبت
نورِ جبینِ کائنات
جس پہ نازاں ہے خدائے ناز ایسا شاہکار
ریگزارِ زندگی میں جلوۂ صُبحِ بہار
جس نے روشن کر دئیے آیاتِ قُرآں کے چراغ
رُوح جاگی، قلب مہکے، جگمگا اُٹھے دماغ
ماہ و انجم کا صحیفہ، لالہ و گُل کی کتاب
جس کے اک اک حرف میں غلطاں ہزاراں آفتاب
معدلت کی اوّلیں تحریر، تنویرِ حیات
جس کو دُنیا نے کہا نُورِ جبینِ کائنات
وقت کی تاریخ کی راہوں میں جس کے نقشِ پا
تا ابد دیتے رہیں گے حق پرستی کو صدا
ابرِ رحمت بن کے آیا تو بجھی صدیوں کی پیاس
جس نے پہنایا ہر اک تہذیبِ عُریاں کو لباس
صُبح بن کر چھا گیا، راتوں پہ جس کا ہر پیام
ہر اذاں کے ساتھ اب بھی گُونجتا ہے جس کا نام
احمدِ مُرسلؐ، محمد مصطفیٰﷺ، حق کا رسول
تا ابد جس کی مہک باقی رہے وہ ایک پھول
وقار خلیل
No comments:
Post a Comment