کہیں دریائے راوی کے کنارے

 لاجونتی

کہیں دریائے راوی کے کنارے

نہاتے تھے جہاں راتوں کر تارے

نشیبِ کوہ میں اک جھونپڑی تھی

جو خود رو لالہ زاروں میں کھڑی تھی

بڑھاپے کی مئے بے رنگ سے چور

وہاں رہتا تھا اک بے چارہ مزدور

نقاہت سے نہ تھا محنت کا یارا

اسے دو بیٹیوں کا تھا سہارا

بڑی ان دونوں میں سے تھی لاجونتی

مقابل میں جو شمشادوں کے تنتی

تھے اس کے حسن سے جنگل سہانے

دبے تھے پاؤں کے نیچے ترانے

سحر کی طرح جب وہ مسکراتی

شرارے سرخ پھولوں سے اڑاتی

جو اڑتی زلف اس کی پیچ در پیچ

نظر آتا خرامِ ابر بھی ہیچ

کہیں اس سے برس چھوٹی تھی رانی

شرابِ نور تھی اس کی جوانی

وہ اس کی حسن سے مخمور آنکھیں

وہ موٹی موٹی موتی چور آنکھیں

ندی اس کی اداؤں پر مچلتی

ہوا اس کا اشارا پا کے چلتی

ذرا اس جھونپڑی سے دور ہٹ کر

کہیں اس خوشنما وادی کے اندر

جواں رہتا تھا اک رادھے سوامی

جوانی اور محبت کا پیامی

وہ جب اپنا پہاڑی ساز اٹھاتا

دلوں میں سوز کی شمعیں جلاتا

جوانی اس کی جب بربط پہ جھکتی

نوا سے بادلوں کی سانس رکتی

ہوا ہونٹوں کو اس کے چومتی تھی

شرابی ہو کے فطرت جھومتی تھی

گزرتی جب ادھر سے لاجونتی

کلیجے کو بجز تھامے نہ بنتی

محبت تھی اسے رادھے کی لے سے

وہ لے میٹھی تھی جو ہراک شے سے

سمجھ کر عشق کا اس کو شوالا

بنا لاتی وہ اک پھولوں کی مالا

وہ مالا عشق جس کی بو سے جاگے

اٹھا کر ڈال دیتی اس کے آگے

مگر وہ بے خودی سے لو لگائے

نوا پرداز رہتا سر جھکائے

ادھر سے ہو کے رانی جب گزرتی

جوانی اس کے آگے رقص کرتی

جو رادھے دیکھتا رانی کو آتے

اسے وہ سرمدی سُر بھول جاتے

وہ تھا اس کی محبت کا بھکاری

جوانی کے شوالے کا پجاری

مگر رانی تھی اک بُوئے پریدہ

محبت سے نہ تھی لذت چشیدہ

محبت جب گریباں چاک پھرتی

وہ آہو کی طرح بے باک پھرتی

غزل خواں اک برس آئی جو برسات

ہوئی رادھے کی رانی سے ملاقات

ندی میں دودھ تھا فطرت کا جاری

ہواؤں پر تھی بادل کی سواری

اسے اس طرح تنہائی میں پا کر

ہوا بے باک عشقِ روح پرور

وہ مالا آج لاجو نے جو دی تھی

ابھی تک سامنے اس کے پڑی تھی

نیازِ عشق کا دے کر حوالا

اسے رادھے نے پہنا دی وہ مالا

جوانی نے محبت کو جگایا

چراغِ آرزوئے دل جلایا

وہ رانی تھی محبت سے جو عاری

ہوئے آنکھوں سے اس کے اشک جاری

وہ اب سمجھی کہ پُروائی ہوائیں

حقیقت میں ہیں رادھے کی نوائیں

وہ اب سمجھی کہ پھولوں کی جوانی

حقیقت میں ہے رادھے کی کہانی

دیے جب جل اٹھے سب بستیوں میں

اٹھی وہ غرق ہو کر مستیوں میں

دوپٹہ ڈال کر سر پر بسنتی

کھڑی تھی راستے میں لاجونتی

پڑیں اس کی جو مالا پر نگاہیں

لبوں تک رہ گئیں آ آ کے آہیں

یہ مالا تھی بلائے نا گہانی

ہوئی سب منکشف اس پر کہانی

مصیبت سے کوئی کس طرح بھاگے

اندھیرا چھا گیا آنکھوں کے آگے

وہ بستی کے دیے کی مسکراہٹ

وہ جھونکوں کی ترانہ ریز آہٹ

وہ شب کی ناچتی پریوں کے سائے

وہ بادل بستیوں پر سر جھکائے

اسے سب یاد رادھے کی دلاتے

تپیدہ حسرتوں کو خوں رلاتے

نظر آیا نہ جب کوئی ٹھکانہ

ہوئی دریائے راوی کو روانہ

اسے برسات نے جانے سے روکا

سہانے آبشاروں نے بھی ٹوکا

جوانی اس کے پیچھے پیچھے بھاگی

فضا شورِ قیامت سن کے جاگی

پہنچ کر دور راوی کے کنارے

شکستہ آرزوؤں کے سہارے

نئی اک زندگی کی ہو کے جویا

ہوئی اس طرح تنہائی میں گویا

مِرے شاہد ہو تم اے دیوتاؤ

جوانی اور محبت کے خداؤ

قیامت عشق پر ڈھائی گئی ہے

جوانی میری ٹھکرائی گئی ہے

کہاں اب آرزووں کے ترانے

یہاں آئی ہوں بھینٹ اپنی چڑھانے

کہا یہ اور آنچل سر پہ ڈالے

ندی کے کر دیا خود کو حوالے

فضا کو آ گیا ٹھنڈا پسینہ

دھڑک اٹھا گلستانوں کا سینہ

ہوا نے اپنے میٹھے گیت چھوڑے

ندی نے آبلے سینے کے پھوڑے

گئی وہ عشق کے امرت کی پیاسی

نظر آنے لگی ہر سو اداسی

بچارا دل شکستہ اور رنجور

کبھی کا مر چکا ہے بوڑھا مزدور

بیاہی بھی گئی رادھے سے رانی

ہوئی یکجا محبت اور جوانی

محبت میں ہیں دونوں اب بھی سچے

ہیں شاہد اس کے دو معصوم بچے

یہ بچے ہیں نہایت بھولے بھالے

حریمِ جنتِ فطرت کے پالے

کبھی راوی میں آتا ہے جو طوفاں

کہا کرتی ہے نرائن سے راماں

صدا باہر جو پیدا ہو رہی ہے

یہ خالہ لاجونتی رو رہی ہے

سراج الدین ظفر