ہر آس یہاں ویراں ویراں
ہر خواہش ہے لرزاں لرزاں
گھر ہو یا شہر ہو ہر جانب
اک نومیدی رقصاں رقصاں
کچھ چہرے دھندلے دھندلے ہیں
کہیں آنکھیں حسن شناس نہیں
کہیں دل یادوں سے ناواقف
کہیں خشک لبوں پر پیاس نہیں
کچھ باتیں ہیں بِن لفظوں کے
کچھ نام یہاں بے نام سے ہیں
کچھ رشتے کھوٹے سِکوں سے
کچھ پیار یہاں الزام سے ہیں
کسی چھت سے دھوپ نہیں رُکتی
کوئی سورج رات بڑھاتا ہے
کسی آگ سے ٹھنڈک بڑھتی ہے
کہیں برف کا لمس جلاتا ہے
ہر دام کی بے بس اُلجھن میں
کب سے بیٹھے ہیں جان پھنسا
ہم سیدھے سادے لوگوں کا
دل کس جمگھٹ میں آن پھنسا
اے شہر کی اُجڑی زرد فضا
کیوں بے حس ہیں تیرے سارے لوگ
کچھ ہم کو بتا کس اوٹ چُھپیں
ہم سے خوابوں کے مارے لوگ
عاصم ثقلین
No comments:
Post a Comment