ہر لفظ کو کاغذ پہ اتارا نہیں جاتا

 ہر لفظ کو کاغذ پہ اُتارا نہیں جاتا​

ہر نام سرِ عام پکارا نہیں جاتا​

ہوتی ہیں محبت میں کئی راز کی باتیں​

ویسے ہی اس کھیل میں ہارا نہیں جاتا​

آنکھوں میں لگایا نہیں جاتا یونہی کاجل​

زلفوں کو بلاوجہ سنوارا نہیں جاتا

​ہر شخص کو طوفان بچانے نہیں آتے​

ہر ناؤ کے ہمراہ کنارا نہیں جاتا​

تب تک نہیں کھلتے کبھی اسرارِ محبت​

جب تک کوئی اس راہ میں مارا نہیں جاتا​

انعام الحق جاوید