تم کتنے خوبصورت ہو

 تم کتنے خوبصورت ہو

مجھے کچھ اپنے جیسے لفظ دو تو میں بھی کچھ لکھوں

مجھے اچھا نہیں لگتا

تِری آنکھوں کے بارے یہ لکھوں کہ جھیل کی گہرائیاں

جس جا پہ تھک جائیں

وہاں پر تیری آنکھوں کے کنارے راج کرتے ہیں

مجھے اچھا نہیں لگتا

کہ تیرے ہونٹ کو بازار میں بِکتے زر و لعل و جواہر سا کہوں

یا پاؤں میں مسلے گلابوں کی طرح لکھوں

جو پل میں سوکھ جاتے ہیں

تم کتنے خوبصورت ہو

مجھے اچھا نہیں لگتا تِرے گالوں کے بارے میں لکھوں

کہ یہ صحیفے ہیں

یہ دنیا تو صحیفوں کی حقانیت پہ بھی سو وار کرتی ہے

مجھے اچھا نہیں لگتا تِری روشن جبیں کو چاند سا لکھوں

کہاں زلفیں تِری ہیں اور کہاں کچھ دیر کے بادل

کہاں تیرا قدو قامت، کہاں یہ ڈھلتی دوپہریں

مجھے اچھا نہیں لگتا تِرے ہاتھوں کے اک اک لمس کو

تشبیہہ دوں دستِ مسیحا سے

کہاں تیرا سراپا اور کہاں یہ عالمِ فانی

تم کتنے خوبصورت ہو

مجھے کچھ اپنے جیسے لفظ دو تو میں بھی کچھ لکھوں

مجھے تسلیم ہے کہ میر صاحب نے

کسی کے ہونٹ کو اک برگِ گل کہہ کر پکارا تھا

مجھے معلوم ہے وہ بھی بہت ہی خوبصورت تھا

کہ آخر میر کو کہنا پڑا تھا

دکانیں حسن کی آگے تِرے تختہ ہوئی ہوں گی

جو تو بازار میں ہو گا تو یوسف کب بِکا ہو گا

مگر افسوس

تم کو میر نے دیکھا نہیں ہے

حسنین محسن