منیر نیازی (شخصی و علمی تعارف و حالات زندگی)

 منیر نیازی

منیر نیازی (اصل نام منیر احمد خان) 9 اپریل 1923سن عیسوی کو متحدہ ہندوستان کے ضلع ہوشیار پور کے ایک نواحی گاؤں خانپور میں پیدا ہوئے۔ آپ ایک سال کے تھے جب آپ والد فتح محمد خان نیازی کا انتقال ہو گیا، والدہ کی دوسری شادی کے بعد کے خانگی مسائل کی وجہ سے ان کا بچپن نہایت نامساعد حالات میں گزرا۔ ابتدائی تعلیم سری نگر سے حاصل کی، میٹرک (منٹگمری) ساہیوال سے کیا،  دیال سنگھ کالج سے بی اے تک تعلیم حاصل کی۔ منیر نیازی نے 17 سال کی کچی عمر میں ایک خوبصورت بیوہ خاتون صغریٰ خانم کو اپنا رفیق زندگی بنایا، جو 1985 میں کینسر میں مبتلا ہو کر انتقال کر گئیں۔ پہلی اہلیہ کے انتقال کے بعد منیر نیازی کی تنہائی کو دیکھتے ہوئے بانو قدسیہ اور اشفاق احمد نے ان کی دوسری شادی رامپور، یو پی سے مہاجرت کر کے کراچی آ کر بس جانے والے خاندان کی ناہید بیگم سے کروا دی۔ دوسری شادی کے بعد بے چین منیر نیازی کی زندگی میں بڑی حد تک ٹھہراؤ آ گیا۔ منیر نیازی 26 دسمبر 2006 سن عیسوی کو انتقال کر گئے اور لاہور ماڈل ٹاؤن میں مدفون ہوئے۔ 

بقول اشفاق احمد کے؛ منیر نیازی کا ایک ایک شعر، ایک ایک مصرع اور ایک ایک لفظ آہستہ آہستہ ذہن کے پردے سے ٹکراتا ہے اور اس کی لہروں کی گونج سے قوت سامعہ متاثر ہوئے بغیر نہیں رہ سکتی۔ منیرنیازی نے قاری کو عشق و محبت کی نیرنگیوں اور واردات عشق کو نئے انداز سے روشناس کرایا ہے۔  منیرحُسنِ فطرت کے شاعر تھے، ان کی شاعری میں ایک بچے کی فینٹسی، پُراسراریت اور ہجرت کا خوف نمایاں ملتا ہے۔ ان کی شعریت میں تنہائی کا شکار ایک بچے کی ایک حسرت بھری خیالی دنیا آباد ملتی ہے۔  ڈر، خوف، تنہائی، حسرت، یاس، اکلاپے، رات، چڑیلوں، سانپوں، جنگلوں، چپ، گھور اندھیارے جیسے استعارے کو جس خوبی سے منیر نیازی نے اپنی شاعری میں استعمال کیا ہے وہ کسی اور شاعر کے ہاں بہت کم ملتا ہے۔ بلاشبہ منیر نیازی کا شمار اردو اور پنجابی کے اعلیٰ پایہ کے شاعروں میں ہوتا ہے۔ منیر نیازی کو ان کی ادبی خدمات پر 1992 میں پرائیڈ آف پرفارمنس، 2005 میں ستارۂ امتیاز اور اکادمی ادبیات پاکستان نے کمال فن ایوارڈ سے بھی نوازا گیا ہے۔ شاعری کے علاوہ انہوں نے پاکستان ٹیلی وژن اور ریڈیو پاکستان  کے لیے ڈرامے اور تمثیلچے بھی لکھے۔ 

منیر نیازی نے فلموں کے لیے گیت بھی لکھے، جن میں سے چند مشہور گیت درج ذیل ہیں؛

اس بے وفا کا شہر ہے اور ہم ہیں دوستو*

جا اپنی حسرتوں پر آنسو بہا کے سو جا*

جس نے میرے دل کو درد دیا اس شکل کو میں نے بھلایا نہیں*

کیسے کیسے لوگ، ہمارے جی کو جلانے آ جاتے ہیں*

یہ کیسا نشہ ہے میں کس عجب خمار میں ہوں*

زندہ رہیں تو کیا ہے جو مر جائیں ہم تو کیا*

اردو تصنیفات؛

بے وفا کا شہر (اردو)*

تیز ہوا اور تنہا پھول (اردو)*

جنگل میں دھنک (اردو)*

دشمنوں کے درمیان میں شام (اردو)*

سفید دن کی ہوا (اردو)*

سیاہ شب کا سمندر (اردو)*

ماہ منیر (اردو)*

تنہا پھول (اردو)*

چھ رنگین دروازے (اردو)*

آغاز زمستان (اردو)*

ساعت سیّار (اردو)*

محبت اب نہیں ہو گی (اردو)* 

تیز ہوا (اردو)*

کلیاتِ منیر (اردو)*

پنجابی تصنیفات؛

سفر دی رات (پنجابی)* 

چار چُپ چیزاں (پنجابی)* 

قصہ دو بھراواں دا (پنجابی)*

رستہ دَسن والے تارے (پنجابی)*

نمونۂ کلام اردو

٭٭٭٭٭٭٭٭٭٭٭٭٭٭٭٭٭٭٭

ہمیشہ دیر کر دیتا ہوں میں، ہر کام کرنے میں

ضروری بات کہنی ہو کوئی وعدہ نبھانا ہو

اسے آواز دینی ہو، اسے واپس بلانا ہو

ہمیشہ دیر کر دیتا ہوں میں

٭٭٭٭٭٭٭٭٭٭٭٭٭٭٭٭٭٭٭

ہم نے اکھٹے دکھ سکھ کاٹے راحت اور مجبوری میں

وصل کی جھلمل جھلمل راتیں، دن غربت کی دوری میں

ایک ناواقف شہر کے اندر چھپے ہوئے شرمائے ہوئے

دو جنگوں میں ساتھ رہے ہم ڈرے ہوئے گبھرائے ہوئے

بگڑے ہوئے رشتوں کے جنگل، وحشت کے صحراؤں میں

ہم نے اکھٹے عمر بتا دی وقت کی دھوپ اور چھاؤں میں

(میں اور صغریٰ)

٭٭٭٭٭٭٭٭٭٭٭٭٭٭٭٭٭٭٭

آس پاس کوئی گاؤں نہ دریا اور بدریا چھائی ہے

شام بھی جیسے کسی پرانے سوگ میں ڈوبی آئی ہے

پل پل بجلی چمک رہی ہے، اور میلوں تنہائی ہے

کتنے جتن کیے ملنے کو پھر بھی کتنی دوری ہے

چلتے چلتے ہار گیا میں پھر بھی راہ ادھوری ہے

گھائل ہے آواز ہوا کی اور دل کی مجبوری ہے

٭٭٭٭٭٭٭٭٭٭٭٭٭٭٭٭٭٭٭

میرے سوا اس سارے جگ میں کوئی نہیں دل والا

میں ہی وہ ہوں جس کی چتا سے گھر گھر ہوا اجالا

میرے ہی ہونٹوں سے لگا ہے نیلے زہر کا پیالا

میری طرح کوئی اپنے لہو سے ہولی کھیل کے دیکھے

کالے کٹھن پہاڑ دکھوں کے سر پہ جھیل کے دیکھے

٭٭٭٭٭٭٭٭٭٭٭٭٭٭٭٭٭٭٭

نمونۂ کلام پنجابی

٭٭٭٭٭٭٭٭٭٭٭٭٭٭٭٭٭٭٭

سِر تے گُھپ ہنیرے تے دھرتی اُتے کال

پیریں کنڈے زہر دے لہو وچ بھجے وال

جتن کرو کجھ دوستو، توڑو موت دا جال

پھڑ مُرلی اوئے رانجھیا، کڈھ کوئی تِکھی تان

مار کوئی تیر اوئے مرزیا کھچ کے ول اسمان

٭٭٭٭٭٭٭٭٭٭٭٭٭٭٭٭٭٭٭

اُپر قہر خدا میرے دا

ہیٹھاں لَکھ بلاواں

سب راہواں تے موت کھلوتی

کیہڑے پاسے جاواں

٭٭٭٭٭٭٭٭٭٭٭٭٭٭٭٭٭٭٭

لَمی رات فراق دی

جیویں ٹھنڈی سِل

چَڑھیا چَن آسمان تے

کنبن لگا دل

٭٭٭٭٭٭٭٭٭٭٭٭٭٭٭٭٭٭٭