عارفانہ کلام حمد نعت منقبت
مقام مصطفیٰﷺ
بلند ہوتا نہ کیسے مقام احمدﷺ کا
احد کے نام سے نکلا ہے نام احمدﷺ کا
فلک نے رکھا ہے نعلین پاکؐ کو سر پر
کِیا ہے عرش نے یوں احترام احمدﷺ کا
بشر زمیں پہ مَلک رک گیا ہے سدرہ پر
خدایا! تُو ہی بتا اب مقام احمدﷺ کا
اب اس سے بڑھ کے بشر کا عروج کیا ہو گا
ہُوا ہے عرشِ خدا پہ قیام احمدﷺ کا
تھا نورِ فاطمہؑ زہرا وسیلۂ معراج
بلا سبب نہ تھا در پر سلام احمدﷺ کا
وہ پھینکے سنگ تو اللہ مارَ مَیتَ کہے
خدا کا ہو گیا جو بھی تھا کام احمدﷺ کا
زمیں پہ دین خدا کس طرح نہ ہو قائم
نظام حق کا ہے اور انتظام احمدﷺ کا
قدم کو مہرِ نبوتؐ پہ ملتی ہے معروج
بنے تو کوئی حقیقی غلام احمدﷺ کا
امیں نہ ہوتا اگر عرش کبریا کا کلیم
تو ہوتا آج یہ قرآں، کلام احمدﷺ کا
کلیم الہ آبادی
ذیشان حیدر جوادی
No comments:
Post a Comment