محبت کی تجارت میں خسارہ کر لیا ہم نے
اُسی کے نام کا پھر استخارہ کر لیا ہم نے
کسی کی آنکھ سے ٹپکے تو رزقِ خاک ہو جائے
وہی آنسو مقدر کا ستارہ کر لیا ہم نے
ابھی تو عشق کے سب زخم تازہ تھے مگر پھر بھی
بنا سوچے بنا سمجھے دوبارہ کر لیا ہم نے
نہیں ہے ہم نفس کوئی جہانِ ناز و نعمت میں
مگر اس زندگی کو بھی گوارا کر لیا ہم نے
کنارے سے سفینہ جب بھنور کے بیچ جا پہنچا
اسی لمحے توکل سے کنارہ کر لیا ہم نے
بھرم ٹوٹا جو دل ٹوٹا، ہمارا مان بھی ٹوٹا
تعجب ہے کہ خود کو پھر تمہارا کر لیا ہم نے
حسین ثاقب
No comments:
Post a Comment