جانے میری کیا طلب تھی اور کیا درکار تھا

 جانے میری کیا طلب تھی اور کیا درکار تھا

زیست کا ہر ایک لمحہ باعثِ آزار تھا

ہر گلی کوچے میں یوں تو چارہ گر موجود تھے

پھر بھی اس کے شہر کا ہر آدمی بیمار تھا

کانچ کے گلدان پر بیٹھی تھی تتلی غمزدہ

پھول اور تتلی کی چاہت کا عجب اظہار تھا

پڑھنے والا سو رہا تھا، اور اس کے سامنے

چائے کی پیالی تھی، کوئی ادھ کُھلا اخبار تھا

دیکھ کر اس کو یقیناً سوچتا تھا ہر کوئی

جیسے اک فنکار کا وہ آخری شہکار تھا

ہر قدم پر ابتلاء تھی، ہر قدم پر امتحاں

عشق کے رستے کا ہر اک مرحلہ دُشوار تھا

ہر کوئی تھا منفرد عادل جہانِ شوق میں

ہر کسی کی زندگی کا مختلف معیار تھا

عادل صدیقی

شبیر صدیقی