مالک بحر و بر
ہے تجھے تو خبر
تیرے پیش نظر
میرے شام و سحر
آنسووں سے ہیں تر
مالک بحر و بر
دشت ویران ہے
شہر گنجان ہے
دل پریشان ہے
آنکھ حیران ہے
اب میں جاؤں کدھر
مالک بحر و بر
تُو ہے افلاک پر
میں تیری خاک پر
سر ہے خاشاک پر
گرد پوشاک پر
منہ چھپاؤں کدھر
مالک بحر و بر
میں بہت رو چکی
اپنا سب کھو چکی
دل میں غم بو چکی
در بدر ہو چکی
دے مجھے رہگزر
مالک بحر و بر
یہ جہاں خوب تھا
دل کو مرغوب تھا
مجھ سے منسوب تھا
میرا، محبوب تھا
اب ہے سُونی ڈگر
مالک بحر و بر
ہوں تیرے روبرو
ہے تیری جستجو
کر مجھے سرخرو
دل سے ہوں با وضو
تیرے قدموں پہ سر
مالک بحر و بر
تبسم اخلاق آفریدی
تبسم اخلاق ملیح آبادی
No comments:
Post a Comment