مرے سخن میں ترا ذکر گر نہیں ہو گا

 مِرے سخن میں تِرا ذکر گر نہیں ہو گا

مِرا کہا ہوا کچھ معتبر نہیں ہو گا

میں چاہتا ہوں کہ تُو مجھ کو بیوفا سمجھے

مِرا یہ چاہا ہوا بھی مگر نہیں ہو گا

تجھے بھی مجھ سے بچھڑنے کا رنج ہو گا مگر

کہ جس قدر ہے مجھے اس قدر نہیں ہو گا

مجھے پلایا ہے وہ زہر زندگی نے کہ اب

کسی بھی زہر کا مجھ پر اثر نہیں ہو گا

تو کیوں نہ آج ملاقات اس سے کی جائے

کہ آج سنڈے ہے وہ کام پر نہیں ہو گا

یہ راہِ عشق ہے اس راہ میں کہیں پر بھی

کوئی بھی سایہ کوئی بھی شجر نہیں ہو گا

یہ جرمِ عشق تھا عجلت کا فیصلہ یعنی

خطا معاف یہ بارِ دگر نہیں ہو گا

معراج نقوی