کیا ترے ملنے کا امکان بھی پورا ہو گا

 کیا تِرے ملنے کا امکان بھی پورا ہو گا 

جو مِرے دل میں ہے ارمان بھی پورا ہو گا

جو تِرے عہدِ ستمگر میں ہوا ہے اب تک 

ہم فقیروں کا وہ نقصان بھی پورا ہو گا 

سجدۂ شوق بجا لانے کی توفیق تو دے

پھر تِری سمت مِرا دھیان بھی پورا ہو گا

اتنی مشکل سی وہ تکمیل بھی کر پاۓ گا

ابنِ آدم کبھی انسان بھی پورا ہو گا

روح بن کر مِرے پندار میں داخل ہو جا

اس طرح سے مِرا نِروان بھی پورا ہو گا

زندگی خواہشوں، خوابوں میں ہے گزری ابتک

چین سے مرنے کا ارمان بھی پورا ہو گا

کر دیا ہم کو اسی فکر نے بوڑھا، عابد 

آگے لے جانے کا سامان بھی پورا ہو گا

عابد کمالوی