تمام حمد بہ خاک اور فلک فلک اس کی

 عارفانہ کلام حمد نعت منقبت

بہار لطف نظارے جھلک، جھلک اس کی

جہانِ رنگ میں ساری دھنک، دھنک اس کی

کنول، گلاب، چنبیلی یہ رات کی رانی

چمن کے سارے گلوں کی مہک، مہک اس کی

یہ آفتاب، قمر اور برق برق سحاب

یہ جھلملاتے ستارے چمک، دمک اس کی

نشاطِ نغمہ اور آواز کا ترنم بھی

حسین لہجوں کی ساری کھنک، کھنک اس کی

بدن کی کارہ گری کے سبھی نشیب و فراز

خرامِ ناز کی ساری لہک، لہک اس کی

سخن طراز ہے دنیا بزعمِ حسنِ خیال

مگر ہے نکتہ وروں کی چہک، چہک اس کی

چہا ر سمت اسی کی ثنا و تعریفیں

تمام حمد بہ خاک اور فلک فلک اس کی

احمد ساقی