وہ مرے دل کا حال کیا جانے

وہ مِرے دل کا حال کیا جانے
سوزِ رنج و ملال کیا جانے
ہر قدم فتنہ ہے، قیامت ہے
آسماں تیری چال کیا جانے
صبر کو سب کمال کہتے ہیں
عاشقی یہ کمال کیا جانے
خون ہوتا ہے کس کی حسرت کا
میرا رنگیں جمال کیا جانے
وہ غریبوں کا حال کیوں پوچھے
وہ غریبوں کا حال کیا جانے
کھو گیا ہو جو دل تصور میں
وہ فراق و وصال کیا جانے
سیلِ خوں کیوں رواں ہے آنکھوں سے
موسمِ برشگال کیا جانے
مر رہے ہیں فراق میں اخترؔ
وہ مگر اپنا حال کیا جانے

اخترؔ شیرانی