ان رس بھری آنکھوں میں حیا کھیل رہی ہے

ان رَس بھری آنکھوں میں حیا کھیل رہی ہے
دو زہر کے پیالوں پہ قضا کھیل رہی ہے
ہیں نرگس و گُل کِس لئے مسحُورِ تماشا
گُلشن میں کوئی شوخ ادا کھیل رہی ہے
اس بزم میں جائیں تو یہ کہتی ہیں ادائیں
کیوں آئے ہو، کیا سر پہ قضا کھیل رہی ہے
خاموش رہ، خاموش، ذرا شورِ قیامت
کانوں میں وہ مستانہ صدا کھیل رہی ہے
اس چشمِ سیاہ مست پہ گیسُو ہیں پریشاں
مئے خانے پہ گھنگھور گھٹا کھیل رہی ہے
بدمستی میں تُم نے اُنہیں کیا کہہ دیا اخترؔ
کیوں شوخ نگاہوں میں حیا کھیل رہی ہے

اختر شیرانی