اب تو ہیں اس شوق گستاخانہ سے بیگانہ ہم

اب تو ہیں اس شوقِ گستاخانہ سے بیگانہ ہم

بس نظر سے چُوم لیتے ہیں لبِ پیمانہ ہم

رات کو تاروں سے، دن کو ذرّہ ہائے خاک سے

کون ہے، جس سے نہیں سُنتے تیرا افسانہ ہم

ضبط کی حد سے اگر شوقِ فراواں بڑھ چلا

آنسوؤں سے بھر کے پی جائیں گے اِک پیمانہ ہم

یہ اندھیری رات، یہ بوسِیدہ کُٹیا، اور آپ

کاش پلکوں پر اٹھا سکتے چراغِ خانہ ہم

کچھ ہماری تیرہ روزی کا بھی درمان کِیجیے

آپ کی آنکھوں میں پاتے ہیں تجلّی خانہ ہم

احمد ندیم قاسمی