ساکن عہد رواں جانا گیا

ساکنِ عہدِ رواں جانا گیا
میں کہاں تھا اور کہاں جانا گیا
جان بیٹھے ہیں جہاں کو ہم مگر
تُو نہیں جانِ جہاں جانا گیا
میں زمیں کا وہ نہالِ کم نصیب
جس کو نخلِ آسماں جانا گیا

بخت کی زنجیر چھنکاتے ہوئے

تھا مقدّر میں جہاں جانا گیا
خیر میں تو وہم تھا اور وہم ہوں
تجھ کو بھی جاناں گُماں جانا گیا
ہائے اب ہم کیا کریں اس عہد میں
عشق کارِ رائیگاں جانا گیا
جسکے پتھر میں نے جوڑے تھے کبھی
اُس کو تیرا آستاں جانا گیا
قیس تنہا چل رہا تھا دَشت میں
اج اُس کو کارواں جانا گیا
ماننے میں اِک سہولت جان کر
جاننا جی کا زیاں جانا گیا
ایک مدّت کی ہماری کھوج سے
ایک حُسنِ جاوداں جانا گیا
بولتے رہنا جہانِ شور میں
کم سُخن کو بے زباں جانا گیا
دُوریوں کا زہر تھا پھیلا ہوا
جس کو نیلا آسمان جانا گیا

شہزاد نیر