شام سے ہجر کے آزار میں کھو جاتے ہیں

شام سے ہجر کے آزار میں کھو جاتے ہیں
دل کو پاتے ہیں تو دِلدار میں کھو جاتے ہیں
نام ہی گرمئ بازار کا بدنام ہوا
خواب تو چشمِ خریدار میں کھو جاتے ہیں
ہم سے اس خوگرِ اقرار کی حالت مت پوچھ
ہم تو خود لذّت انکار میں کھو جاتے ہیں

کوئی پائے تو بتائے کہ حقیقت کیا ہے

ہوش کیوں حُسن کی سرکار میں کھو جاتے ہیں
حاصلِ کارِ زیاں سب پہ عیاں ہے پھر بھی
لوگ خود کو یہاں بے کار میں کھو جاتے ہیں
منزلیں پائے ہوئے ہم کو بتاتے ہی رہے
راہرو سایۂ دیوار میں کھو جاتے ہیں
ڈھونڈنے والوں کو دونوں کا نشاں تک نہ ملے
آؤ ہم وصل کے اسرار میں کھو جاتے ہیں
راستہ حیرتِ دیدار کا تکتے تکتے
آئینے حسرتِ دیدار میں کھو جاتے ھیں

شہزاد نیر