میں دیکھ رہا ہوں مجھے اندھا نہ سمجھنا

تو آپ کو پوشیدہ و اخفا نہ سمجھنا

میں دیکھ رہا ہوں مجھے اندھا نہ سمجھنا

کم شیرِ ژیان سے مِرا رتبہ نہ سمجھنا

کتا ہوں علی کا سگِ دنیا نہ سمجھنا

ہمراہ مِرے رہتی ہے ہر دم مددِ غیب

لاکھوں پہ ہوں بھاری مجھے تنہا نہ سمجھنا

بزمِ غمِ شبیر میں جو چشم سے نکلے

ہر اشک کو تسبیح کا اک دانہ سمجھنا

جو دل کہ مبرا ہو محبت سے جہاں کی

اس دل کو دِلا! یار کا کاشانہ سمجھنا

نامہ جو لکھا ہے اسے رکھ چھوڑیو صاحب

وہ خطِ غلامی ہے، "نوِشتا" نہ سمجھنا

کافر ہوں نہ پھونکوں جو تِرے کعبہ میں اے شیخ

ناقوس بغل میں ہے، مصلیٰ نہ سمجھنا

دیدار دکھا دیجئے غش آئیں تو آئیں

عاشق ہوں میں عاشق، مجھے موسیٰ نہ سمجھنا

رکھنا نہ توقع دلِ ناداں! تُو کسی سے

اس وقت میں اپنوں کو بھی بیگانہ سمجھنا

بہکا ہوا عاشق نظر آ جائے جو کوئی

اس چشمِ فسوں ساز کا دیوانہ سمجھنا

سر کٹ کے جو قدموں پہ گرے راہِ وفا میں

یہ بھی مددِ ہمتِ مردانہ سمجھنا

صحت تِری ممکن نہیں سن رکھ دلِ بیمار

یہ گورکن آیا ہے، مسیحا نہ سمجھنا

ہر حال میں خورسَند ہوں تم خوش ہو کہ ناخوش

بندہ ہوں، مجھے عاشقِ شیدا نہ سمجھنا

پلوا دے مۓ ہوشربا، دیکھ مِرا ظرف

ساقی جو بہک جاؤں تو دیوانہ سمجھنا

آ جائے کوئی ڈھیر اگر پاؤں کے نیچے

اے شمع رخو! مرقدِ پروانہ سمجھنا

اے رند نہ ٹِکنا کبھی اربابِ ورع پاس

مل بیٹھنا اس سے جسے رندانہ سمجھنا

رند لکھنوی