کیوں کر نہ لائے رنگ گلستاں نئے نئے
گاتے ہیں راگ مرغِ خوش الحاں نئے نئے
دلبر متاعِ دل کے ہیں خواہاں نئے نئے
کرتا ہے حسن عشق کے ساماں نئے نئے
آسیبِ عشق سر سے اترتا نہیں مِرے
بہکا کے تم کو کوئی لگا لے نہ راہ پر
نکلے ہو آج گھر سے مِری جاں! نئے نئے
کس درجہ تنگ ہوں تِرے ہاتھوں سے اے جنوں
لاؤں کہاں سے روز گریباں نئے نئے
غم کا گزر ہے گاہ، گہے خرمی کا دخل
آتے ہیں روز گھر مِرے مہماں نئے نئے
صورت سے اک پری کی ہمیں عشق تازہ ہے
دیوانے ہم ہوئے ہیں سلیماں نئے نئے
ملکِ عدم ہے، یا کوئی ننگوں کا شہر ہے
ہر روز واں سے آتے ہیں عریاں نئے نئے
اس زلف کے خیال میں آنکھیں تو بند کر
دکھلائی دیں گے خواب پریشاں نئے نئے
پھرتا نہیں وہ دست نگاریں کسی طرح
کرتا ہے زور پنجۂ مرجاں نئے نئے
کر سیر چشم غور سے جو ذوق شعر ہے
مضموں دکھائے گا مِرا دیواں نئے نئے
ہنس ہنس کے بار بار نہ کیونکر دکھائیں آپ
نامِ خدا نکالے ہیں دنداں نئے نئے
رند لکھنوی
No comments:
Post a Comment