ہے کوچہ الفت میں وحشت کی فراوانی

 ہے کوچۂ الفت میں وحشت کی فراوانی

جب قیس کو ہوش آیا لیلٰی ہوئی دیوانی

پیش آئی وہی آخر جو کچھ کہ تھی پیش آئی

قسمت میں ازل ہی سے لکھی تھی پریشانی

دل اس کو دیا میں نے یہ کس کو دیا میں نے

غفلت سی مِری غفلت، نادانی سی نادانی

جائے نہ مِرے سر سے سودا تِری زلفوں کا

اُلجھن ہی رہے مجھ کو کم ہو نہ پریشانی

اب نزع کی تکلیفیں برداشت نہیں ہوتیں

تم سامنے آ بیٹھو دم نکلے بآسانی

اقلیمِ محبت کی دنیا ہی نرالی ہے

نادانی ہے دانائی، دانائی ہے نادانی

ہو زیست جنہیں پیاری وہ اور کوئی ہوں گے

ہم مر کے دکھا دیں گے مرنے کی اگر ٹھانی

ہشیارئ زائد سے اچھی مِری بے ہوشی

اس دلقِ ریائی سے بہتر مِری عریانی

کیا وادئ غربت میں بچھڑی ہے یہ بیدم سے

سر پیٹتی پھرتی ہے کیوں بے سر و سامانی

بیدم شاہ وارثی