پیراہن سیہ نہ عزا خانہ شرط ہے

پیراہنِ سیہ نہ عزا خانہ شرط ہے

غم کے لیے فقط تِرا یاد آنا شرط ہے

محفل وہیں جمے گی جہاں بیٹھ جائیں یار

کب ہاؤ ہو کے واسطے مے خانہ شرط ہے

آپ اور میں تو لازم و ملزوم ہیں، جناب

اثباتِ حُسن کے لیے دیوانہ شرط ہے

تو میرے روکھے پن پر تلملا نئیں

تُو میرے رُوکھے پن پر تلملا نئیں

میں جتنا بے مروت اب ہوں، تھا نئیں

خوشی بے حد سہانی کیفیت ہے

مگر غم سے زیادہ دیرپا نئیں

مِرے اشکوں کو مت بہلائیں، جائیں

یہ میرا مسئلہ ہے، آپ کا نئیں

عمر بھر عشق کسی طور نہ کم ہو آمین

عمر بھر عشق کسی طور نہ کم ہو، آمین

دل کو ہر روز عطا نعمتِ غم ہو، آمین

میرے کاسے کو ہے بس چار ہی سکّوں کی طلب

عشق ہو، وقت ہو، کاغذ ہو، قلم ہو، آمین

حجرۂ ذات میں یا محفلِ یاراں میں رہوں

فکر دنیا کی مجھے ہو بھی تو کم ہو، آمین

تم پکار لو تمہارا انتظار ہے

گیت

تم پکار لو 

تمہارا انتظار ہے

خواب چن رہی ہے رات، بیقرار ہے

تمہارا انتظار ہے

تم پکار لو

صرف آنکھیں ہی دیکھیں تھیں میں نے

صرف آنکھیں ہی دیکھیں تھیں میں نے 

نیم باز ان آنکھوں سے جب 

نیم کش اک نگاہ اٹھی تھی 

اک خلش رہ گئی ہے سینے میں

میر کہتے تھے

"نیم باز آنکھوں میں ساری مستی شراب کی سی ہے" 

غم دوراں کی کسی رات سے کب گزرا ہے

غمِ دوراں کی کسی رات سے کب گزرا ہے 

یہ جنوں قرب کے لمحات سے کب گزرا ہے

تُو بھی میری ہی طرح خود سے گریزاں ہوتا

تُو مِری جاں، مِرے خدشات سے کب گزرا ہے

ہر گھڑی خوف لگا رہتا ہے بچھڑ جانے کا 

تُو ابھی شہر طلسمات سے کب گزرا ہے

ٹوٹے ہوئے سپنے کی طرف دیکھ رہا ہے

ٹوٹے ہوئے سپنے کی طرف دیکھ رہا ہے

بچہ ہے کھلونے کی طرف دیکھ رہا ہے

ہر چند نظر بدلی ہے ہر شخص نے لیکن

وہ پھر بھی زمانے کی طرف دیکھ رہا ہے

بچنے کے تمہیں جو بھی جتن کرنے ہیں کر لو

طوفان کنارے کی طرف دیکھ رہا ہے

کب کہاں کس سے کوئی وصل کی شب مانگتا ہے

کب کہاں کس سے کوئی وصل کی شب مانگتا ہے

سرد راتوں کے گزرنے کا سبب مانگتا ہے

اپنے خوابوں کے فسُوں سے وہ نکل آیا ہے

رنگ کچھ ہلکے وہ تصویر میں اب مانگتا ہے

کیا عجب خواہشیں اس ذہن نے پالی ہوئی ہیں

دن کو ڈھلنے نہیں دیتا ہے پہ شب مانگتا ہے

یہی منظر تھے انجانے سے پہلے

یہی منظر تھے انجانے سے، پہلے

تمہارے شہر میں آنے سے پہلے

زمیں کی دھڑکنیں پہچان لینا

کوئی دیوار بنوانے سے پہلے

پلٹ کر کیوں مجھے سب دیکھتے ہیں

تمہارا ذکر فرمانے سے پہلے

رستہ روکتی خاموشی نے کون سی بات سنانی ہے

رستہ روکتی خاموشی نے کون سی بات سنانی ہے
رات کی آنکھیں جان چکی ہیں، کس کے پاس کہانی ہے
جب اس کی وسعت سے نکلے میری وحشت، خواب، سراب
دامن جھاڑ کے دشت پکارا، اب کیسی ویرانی ہے
منظر ہے کھڑکی کے اندر یا ہے کھڑکی سے باہر
گردوں کی گیرائی ہے یا خاک نے چادر تانی ہے

بول کنارے

بول کنارے

کانچ کی چُوڑی ہاتھ پہ توڑ کے

ٹکڑوں میں اک خواب سجایا

بادل میں اک شکل بنا کر

پورے سال کی بارش آنکھ سے برسا دی

رخساروں سے پلک اٹھا کر

مرے بدن سے مت لپٹ حواس باختہ ہوا

مِرے بدن سے مت لِپٹ حواس باختہ ہوا

بجھے چراغ سے تِرا کہاں کا واسطہ ہوا

نہ تالیاں بجا مِرے بکھرتے بال و پر پہ یوں

تِری طرف پلٹ پڑے خدانخواستہ ہوا

غبار اڑاتی مقتلوں سے مکتبوں تک آ گئی

نجانے کون وحشتوں کی فیض یافتہ ہوا

یہ دھند صبح زمستاں یہ برف زار اور میں

یہ دھند، صبحِ زمستاں، یہ برفزار اور میں

لہو میں تازہ تِرے وصل کا خمار اور میں

یہ خواب جیسی حسیں صبحِ وادئ کالام

پھر اس پہ تیری توجہ کا اعتبار اور میں

یہ ریستوران کا ٹیرس، یہ صبح کی چائے

تمہارے نیند سے اٹھنے کا انتظار اور میں

لہر اس آنکھ میں لہرائی جو بے زاری کی

لہر اس آنکھ میں لہرائی جو بے زاری کی

میں نے ہنستے ہوئے پھر کوچ کی تیاری کی

مجھے جس رات سمندر نے اتارا خود میں

میں نے اس رات بھی ساحل کی طرفداری کی

میں نے گریہ کو بھی آداب کے اندر رکھا

اپنے اعصاب پہ وحشت نہ کبھی طاری کی

دیکھ پائی نہ مرے سائے میں چلتا سایہ

دیکھ پائی نہ مِرے سائے میں چلتا سایہ

رات نے چھین لیا پھر مِرا ڈھلتا سایہ

میں نے اس واسطے منہ کر لیا سورج کی طرف

مجھ سے دیکھا نہ گیا آگے نکلتا سایہ

میں وہی ہوں مِرا سایہ بھی وہی ہے اب تک

میں بدلتا تو کوئی رنگ بدلتا سایہ

یہ وقت عصر ہے لہجے میں پیاس شامل کر

یہ وقتِ عصر ہے لہجے میں پیاس شامل کر

دعائے شام میں خالی گلاس شامل کر

تُو اپنے وصل کے اس میٹھے لال شربت میں 

ہماری مان زرا سی کھٹاس شامل کر

یہ ریشمی ہمیں گمراہ کرتا ریتا ہے

بدن بُنت میں بہت سی کپاس شامل کر

قسم اٹھاؤ کہ اب محبت نہیں کرو گی

جو میں مروں گا تو ساتھ میرے نہیں مرو گی

قسم اٹھاؤ کہ اب محبت نہیں کرو گی

تو کیا کہو گی کہ شہزادہ نہیں ملا تھا

تو اپنے بچوں سے ذکر میرا نہیں کرو گی

میں گاؤں کا ہوں سو ڈر رہا ہوں جدائیوں سے

تُو شہر کی ہے میں جانتا ہوں نہیں ڈرو گی

خود پرستی میں ہی مرے گا کیا

خود پرستی میں ہی مرے گا کیا

اس قدر حسن کا کرے گا کیا

آج میری کھلی ہتھیلی پر

پھول کے بدلے دل دھرے گا کیا

میرے بازو پہ سونے والے تُو

اب اکیلا نہیں ڈرے گا کیا

ذرا سے ہجر پہ تکرار کرنے لگ گئی ہے

ذرا سے ہجر پہ تکرار کرنے لگ گئی ہے

وہ بدتمیز مجھے پیار کرنے لگ گئی ہے

میں خوش تھا اپنے ہی جیسے بیوفاؤں میں 

تری وفا مجھے بیمار کرنے لگ گئی ہے

ہمارا رزق ابھی تک نظر نہیں آیا

بدن کی بھوک تو اظہار کرنے لگ گئی ہے

درون جسم کی چیخ و پکار سے پہلے

درون جسم کی چیخ و پکار سے پہلے

صدائیں آتی تھیں قرب و جوار سے پہلے

ہمارے ربط کو ترتیب نے بگاڑا ہے 

میں اس کے ساتھ کھڑا تھا قطار سے پہلے

نظر نہ آنا بصارت کا عیب تھوڑی ہے

دکھائی دیتا ہے گرد و غبار سے پہلے

تمہارے بعد الٹ ہو گئی ہیں ترتیبیں

مختصر نظم

تمہارے بعد

الٹ ہو گئی ہیں ترتیبیں

کہیں پہ لوہے کی کھڑکی کو کھا گئی دیمک

کہیں کواڑ کی لکڑی کو زنگ لگ گیا ہے

حسیب الحسن

گلاب چہروں کی شادمانی کا کیا بنے گا

گلاب چہروں کی شادمانی کا کیا بنے گا؟

کہ باغ چھوڑا تو "باغبانی" کا کیا بنے گا؟

ہمارے آنسو کسی ٹھکانے تو لگ رہے ہیں

فرات کے بد نصیب پانی کا کیا بنے گا؟

جو ناسمجھ تھے وہ اس کو پڑھنے میں لگ گئے ہیں

میں سوچتا ہوں کہ جون جانی کا کیا بنے گا؟

دل کے معاملات سے انجان تو نہ تھا

دل کے معاملات سے انجان تو نہ تھا

اس گھر کا فرد تھا کوئی مہمان تو نہ تھا

تھیں جن کے دَم سے رونقیں شہروں میں جا بسے

ورنہ ہمارا گاؤں یوں ویران تو نہ تھا

بانہوں میں جب لیا اسے نادان تھا ضرور

جب چھوڑ کر گیا مجھے نادان تو نہ تھا

یہ سیاست بھی کیا عجب شے ہے

سیاست

یہ سیاست بھی کیا عجب شے ہے

میں سمجھتا ہوں میں بھی حق پر ہوں

تم سمجھتے ہو تم بھی حق پر ہو

میں تمہیں ماردوں تو تم ہو شہید

تم مجھے مار دو تو میں ہوں شہید

آخری ٹیس آزمانے کو

آخری ٹیس آزمانے کو 

جی تو چاہا تھا مسکرانے کو

یاد اتنی بھی سخت جاں تو نہیں 

اک گھروندا رہا ہے ڈھانے کو

سنگریزوں میں ڈھل گئے آنسو 

لوگ ہنستے رہے دکھانے کو

زباں کو حکم نگاہ کرم کو پہچانے

زباں کو حکم، نگاہِ کرم کو پہچانے 

نگہ کا جرم، غبارِ الم کو پہچانے 

وہ ایک جام کہاں ہر کسی کی قسمت میں 

وہ ایک ظرف کہ اعجاز‌ سم کو پہچانے 

متاع درد پرکھنا تو بس کی بات نہیں 

جو تجھ کو دیکھ کے آۓ وہ ہم کو پہچانے 

تو کہاں رہ گئی میں کہاں آ گیا

اے مری زندگی اے مری ہم نوا، تُو کہاں رہ گئی میں کہاں آ گیا 

کچھ نہ اپنی خبر کچھ نہ تیرا پتا، تُو کہاں رہ گئی میں کہاں آ گیا 

جتنے چہرے چراغوں کے تھے بجھ گئے، اب وہ جلسے گئے وہ قرینے گئے 

اب کدھر جی لگے شامِ یاراں بتا، تُو کہاں رہ گئی میں کہاں آ گیا 

درد میں درد کی سی چمک ہی نہیں وہ زمیں ہی نہیں وہ فلک ہی نہیں 

بے ستارہ ہے شب اے شبِ آشنا، تُو کہاں رہ گئی میں کہاں آ گیا 

وہ بیوفا ہے تو کیا مت کہو برا اس کو

وہ بے وفا ہے تو کیا مت کہو برا اس کو

کہ جو ہوا سو ہوا خوش رکھے خدا اس کو

نظر نہ آئے تو اس کی تلاش میں رہنا

کہیں ملے تو پلٹ کر نہ دیکھنا اس کو

وہ سادہ خُو تھا زمانے کے خم سمجھتا کیا 

ہوا کے ساتھ چلا لے اڑی ہوا اس کو

کیا بڑے لوگ ہیں یہ عشق کے مارے ہوئے لوگ

کیا بڑے لوگ ہیں یہ عشق کے مارے ہوئے لوگ

اپنے اِمروز میں فردا کو گزارے ہوئے لوگ

تجھ سے بے رُخ ہوئے جب آئینہ خانے تیرے

کام آۓ ہیں یہی دل کے سنوارے ہوئے لوگ

سلسلے جوڑتے رہتے ہیں سخن کے کیا کیا

یہ تری چُپ، ترے لہجے کے پکارے ہوئے لوگ

مقتل میں چمکتی ہوئی تلوار تھے ہم لوگ

مقتل میں چمکتی ہوئی تلوار تھے ہم لوگ 

جاں نذر گزاری پہ بھی تیار تھے ہم لوگ

ہم اہلِ شرف لوگ تھے اس شہر میں، لیکن 

رسوا بھی سرِ کوچہ و بازار تھے ہم لوگ

کام آتے نہ تھے ہم کو بس اک کارِ جنوں کے 

دنیا کی نگاہوں میں تو بے کار تھے ہم لوگ

ہجر سے ہو نہ ہی وصال سے ہو

ہجر سے ہو نہ ہی وصال سے ہو

ہو محبت تو اس کمال سے ہو

یہ جو آئینہ چپ ہے، ممکن ہے

محوِ حیرت ترے جمال سے ہو

نقشِ گر! کیا خبر کہ تیرا وجود

خود کسی نقش کے خیال سے ہو

روز تلخی یوں پینی پڑتی ہے

روز تلخی یوں پینی پڑتی ہے

جیسے چائے میں چینی پڑتی ہے

کون آئے مِرے تعاقب میں

راہ میں بے زمینی پڑتی ہے

اس قدر تو نہیں جگہ دل میں

جس قدر بے یقینی پڑتی ہے

دھڑکنوں کے سفیر ہو جائیں

دھڑکنوں کے سفیر ہو جائیں

جب یہ موسم شریر ہو جائیں

تھوڑی ہم پر عطا محبت کی

تھوڑے ہم بھی امیر ہو جائیں

مجھ پہ ہجرت اتارنا مولا

لوگ جب بے ضمیر ہو جائیں

ربط اخلاص سے زیادہ ہے

ربط، اخلاص سے زیادہ ہے

ضبط بھی پیاس سے زیادہ ہے

خاص ہوتے ہیں زندگی میں لوگ

اور تُو خاص سے زیادہ ہے

جسم پہ اوڑھ لی ہے غربت جو

جسم پہ ماس سے زیادہ ہے