غم دوراں کی کسی رات سے کب گزرا ہے

غمِ دوراں کی کسی رات سے کب گزرا ہے 

یہ جنوں قرب کے لمحات سے کب گزرا ہے

تُو بھی میری ہی طرح خود سے گریزاں ہوتا

تُو مِری جاں، مِرے خدشات سے کب گزرا ہے

ہر گھڑی خوف لگا رہتا ہے بچھڑ جانے کا 

تُو ابھی شہر طلسمات سے کب گزرا ہے

آگ تو دُور، تپش اس کی جلاسکتی ہے 

شہرِ دل کے تُو مضافات سے کب گزرا ہے

درد، تنہائی، گھٹن، خوف، جنوں اور ہراس 

سُکھ بھلا ایسے مقامات سے کب گزرا ہے

اس کو اندازہ نہیں دکھ کا میرے کچھ ثاؔقب 

وہ مِری روح کے صدمات سے کب گزرا ہے

سہیل ثاقب