نقص نکلیں گے ماہ کامل میں​

نقص نکلیں گے ماہِ کامل میں​

وہ اگر آ گئے مقابل میں​

فرطِ شوخی سے وہ نظر نہ پڑے​

آۓ بھی، اور نہ آئے محفل میں​

ہو جو ہمت تو سب کچھ آساں ہو​

دِقتیں ہیں جو کارِ مشکل میں​

دیکھ کیفیت گدائے مغاں​

کشتئ مۓ ہے دستِ سائل میں​

وہ اور آئیں مِری عیادت کو​

یوں کہو یہ بھی آ گئی دل میں​

دامِ کاکل میں خاک ہو آرام​

ہوں میں جکڑا ہوا سلاسل میں​

وہ کریں میری یاد، کیسی یاد​

نام میرا ہے فردِ باطل میں​

وہ تو منڈی ہے سرفروشوں کی​

کیوں نہ جمگھٹ ہو کوئے قاتل میں​

نہ رہے دوستانِ عشرت کوش​

کون دھومیں مچائے محفل میں​

وہ تو رہتے نہیں ہیں پھر ہر دم​

درد رہتا ہے ان کا اس دل میں​

رُوئے تاباں کے رشک سے تاصبح​

جلتی رہتی ہے شمع محفل میں​

سن کے حالِ مصائبِ مجروؔح​

اپنے تو چوٹ لگتی ہے دل میں​

میر مہدی مجروح