میرے سنگِ مزار پر فرہاد
رکھ کے تیشہ کہے ہے یا استاد
ہم سے بِن مرگ کیا جدا ہو ملال
جان کے ساتھ ہے دلِ ناشاد
آنکھیں مُوند اور سفر عدم کا کر
فکرِ تعمیر میں نہ رہ منعم
زندگانی کی کچھ بھی ہے بنیاد
خاک بھی سر پہ ڈالنے کو نہیں
کس خرابہ میں ہم ہوئے آباد
لگتی ہے کچھ سموم سی تُو نسیم
خاک کس دل جلے کی کی برباد
بھولا جائے ہے غمِ بُتاں میں جی
غرض آتا ہے پھر خدا ہی یاد
تیرے قیدِ قفس کا کیا شکوہ
نالہ اپنے سے، اپنے سے فریاد
ہر طرف ہیں اسیر ہم آواز
باغ ہے گھر تِرا تو اے صیاد
ایسا ہرزہ ہے وہ کہ اٹھتے صبح
سو جگہ جانا اس کی ہے معتاد
خوب ہے خاک سے بزرگاں کی
چاہنا تو مِرے تئیں امداد
پر مروت کہاں اسے اے میرؔ
تُو ہی مجھ دل جلے کو کر ناشاد
نامرادی ہو جس پہ پروانہ
وہ جلاتا پھِرے چراغِ مراد
میر تقی میر
No comments:
Post a Comment