قیدِ تنہائی میں خود کو یوں سزا دیتا ہوں
اک غزل لکھتا ہوں اور ایک مٹا دیتا ہوں
شکوہ کرتا ہے غمِ زیست کا کوئی تو اسے
🍷بادۂ تلخیِٔ ایام پلا دیتا ہوں🍷
ہے دوائے غمِ دل صورتِ جاناں کی دید
غم جو بڑھتا ہے، دوا بھی میں بڑھا دیتا ہوں
جب مجھے اہلِ خرد طعنِ جنوں دیتے ہیں
تیری تصویر سے پردے کو اٹھا دیتا ہوں
ہوں ازل سے ہی میں تقدیر پہ راضی بہ رضا
آگ لگتی ہے جو گھر میں تو ہوا دیتا ہوں
مجھ میں، واعظ میں ہمیشہ ہی ٹھنی رہتی ہے
پند کرتا ہے وہ، میں 🍷 جام بڑھا دیتا ہوں
آج تک مجھ پہ بھی یہ راز ضیا کھل نہ سکا
کون سنتا ہے مجھے؟ کس کو صدا دیتا ہوں؟
طاہر ضیا
No comments:
Post a Comment