سخن میں رنگ تمہارے خیال ہی کے تو ہیں

سخن میں رنگ تمہارے خیال ہی کے تو ہیں

یہ سب کرشمے ہوائے وصال ہی کے تو ہیں

یہاں بھی اس کے سوا اور کیا نصیب ہمیں

ختن میں رہ کے بھی چشمِ غزل ہی کے تو ہیں

جسارتِ سخنِ شاعراں سے ڈرنا کیا

غریب مشغلۂ قیل و قال ہی کے تو ہیں

ہوا کی زد پہ ہمارا سفر ہے کتنی دیر

چراغ ہم کسی شامِ زوال ہی کے تو ہیں

کہا تھا تم نے کہ دیتا ہے کون عشق میں جان

سو ہم جواب تمہارے سوال ہی کے تو ہیں

شہا! ملال نہ رکھ خاک اڑانے والوں سے

کہ یہ گواہ تیرے مِلک و مال ہی کے تو ہیں

عرفانؔ صدیقی