اچھا نہیں کہ اوج سے پندار گر پڑے

اچھا نہیں کہ اوج سے پندار گر پڑے

اتنا نہ سر اُٹھا کہ دستار گر پڑے

ہو گا تمہیں بھی رنج ہنسے گا اگر کوئی

ٹھوکر سے تم جہاں سرِ بازار گر پڑے

جلتے ہیں دھوپ میں کہ یہ رہتا ہے ڈر ہمیں

سائے میں بیٹھتے ہی نہ دیوار گر پڑے

دیمک نے کر دیا تھا انہیں کھوکھلا بہت

چھیڑ ا ذرا ہوا نے تو اشجار گر پڑے

آندھی گِرا سکی نہ کسی بانجھ پیڑ کو

اکثر یہی ہوا کہ ثمر بار گر پڑے

گلزارؔ ناتواں تھا پر کاہ بچ گیا

بھونچال میں بڑے بڑے کُہسار گر پڑے

گلزار بخاری