نہ بام و دشت نہ دریا نہ کوہسار ملے

نہ بام و دشت، نہ دریا، نہ کوہسار ملے

جنوں کی راہ تھی حالات سازگار ملے

لبوں پہ حرفِ شکایت بھی آ کے ٹوٹ گیا

وہ خود فگار تھے جو ہاتھ سنگبار ملے

ادھر فصیلِ شبِ غم، ادھر ہے شہر پناہ

صبا سے کہیو وہیں آ کے ایک بار ملے

یہ بے بسی تو مِرے عہد کا مقدر تھی

دلوں کو داغِ تمنا بھی مستعار ملے

ہتھیلیوں پہ چراغِ دعا سجاۓ ہوۓ

ملے نگارِ بہاراں تو شرمسار ملے

کوئی تو راہِ تمنا میں ہم سفر ہوتا

کوئی تو کوۓ وفا میں خطا شعار ملے

محبتوں سے تو پہلے ہی کیا توقع تھی

مروتوں کے بھی دامان تار تار ملے

میں کیسے اپنے خدوخال آج پہچانوں

جو آئینہ ملے، آلودۂ غبار ملے

مِری طلب کی یہ معراج ہے، کہ عجز اداؔ

جدھر سے گزروں وہیں ایک رہگزار ملے

ادا جعفری