فراق یار میں دل یا جگر کو دیکھتے ہیں

 فراقِ یار میں دل یا جگر کو دیکھتے ہیں

جدھر لگی ہے ہمیں چوٹ اُدھر کو دیکھتے ہیں

جفا کا شوق ہے کہتے ہیں ناز کی بھی ہیں

وہ پہلے تیغ کو اور پھر کمر کو دیکھتے ہیں

کُھلا ہے منہ جو لحد میں کُھلا ہی رہنے دو

جگہ نئی ہے مُسافر ہیں، گھر کو دیکھتے ہیں

ہمارے درد کو جاتا ہے "لا دوا" کہہ کر

نگاہِ یاس سے ہم چارہ گر کو دیکھتے ہیں

کسی میں تو نظر آ جائے گا تِرا جلوہ

اسی خیال سے ہم ہر بشر کو دیکھتے ہیں

یہاں تک اپنی طبیعت ہے بدگُمان ان سے

کہ ان کی بزم میں ہر اک کی نظر کو دیکھتے ہیں

جوانی آتے ہی ان کو غرورِ حُسن آیا

کچھ اب پھری ہوئی ان کی نظر کو دیکھتے ہیں

یہ کیوں زبان سے ارشاد ہو گا خط کا جواب

کہ نامہ دیکھ کے اب نامہ بر کو دیکھتے ہیں

غضب ہے دیکھ کے غیروں کو وہ کنکھیوں سے

یہ پوچھتے ہیں کہو! ہم کدھر کو دیکھتے ہیں

ہر اک سخن میں نہاں ہیں سو صورتِ معنی

ہم ان کے حسن کے حسنِ اثر کو دیکھتے ہیں

ستانے کو مجھے کہتے ہیں غیر کی نظریں

یہ وہ نظر ہیں کہ ہم جس کی نظر کو دیکھتے ہیں

تسلیاں شبِ فُرقت میں کٹیں گے آخر کار

ابھی ترقئ سوزِ جگر کو دیکھتے ہیں

پڑے نہ لچک کہیں راہ میں بوقتِ خرام

سنبھل سنبھل کے وہ اپنی کمر کو دیکھتے ہیں

وہ خود ہی ہو گئے آزاد طالبِ دیدار

ہم آہ آہ کے حُسنِ اثر کو دیکھتے ہیں

ابوالکلام آزاد