طناب خیمہ نہ موج بلا سے ڈر کر کھینچ

طنابِ خیمہ نہ موجِ بلا سے ڈر کر کھینچ

اگر حباب ہے آغوش میں سمندر کھینچ

مِرے حریف کھلے دل سے اب شکست بھی مان

نہ یہ کہ فرطِ ندامت سے منہ پہ چادر کھینچ

مبادا کل کسی بسمل پہ رحم آ جائے

کچھ اور روز ابھی تیغِ ناز ہم پر کھینچ

وہ حرف لکھ کہ بیاضِ سخن لہو سے سجے

قلم سے دشنہ کی صورت لکیر دل پر کھینچ

ہیں منفعل مِرے قامت سے تیری دیواریں

حصار تو مِرے قد کاٹھ کے برابر کھینچ

نہیں تو اس کے تغافل کا کیا گِلہ کرنا

جو حوصلہ ہے تو دامانِ یار بڑھ کر کھینچ

کہ شاعری بھی تو جزوِ پیمبری ہے فرازؔ

سو رنجِ خلقِ خدا صورتِ پیمبر کھینچ

احمد فراز