ماں جہاں بستی ہے ہر چیز وہیں اچھی ہے
آسماں! تیرے ستاروں سے زمیں اچھی ہے
ماں کے ہونے سے مِری عمرِ رواں ساکن ہے
سر پہ اک ابرِ خنک، سایہ کناں ساکن ہے
ماں کا ہونا عملِ خیر کے ہونے کی دلیل
ماں کا دل نقطۂ پرکارِ نظامِ ہستی
ماں کے ہاتھوں کے سبب گردشِ جامِ ہستی
ماں جو تڑپے رگِ سنگ سے شبنم پھوٹے
آگ میں پھول کھلیں خاک سے زمزم پھوٹے
راستہ بند جو ہو ماں کی دعاؤں سے کُھلے
ماں کے اشکوں سے مِرا نامۂ اعمال دُھلے
ماں ہے وہ چھاؤں جہاں لُو بھی خنک ہو جائے
بارِ ہستی مِرے کاندھوں پہ سبک ہو جائے
مجھ پہ یہ چھاؤں سدا بار خدایا رکھنا
سر برہنہ ہوں، مِرے سر پہ یہ سایا رکھنا
خورشید رضوی
No comments:
Post a Comment