گل کھلاتی ہوئی شاداب زمیں چاہتے ہیں

گُل کھلاتی ہوئی شاداب زمیں چاہتے ہیں

اور کیا تجھ سے ترے خاک نشیں چاہتے ہیں

ہم کو منظور نہیں پھر سے بچھڑنے کا عذاب

اس لیے تجھ سے ملاقات نہیں چاہتے ہیں

کب تلک در پہ کھڑے رہنا ہے، اُن سے پوچھو

کیا وہ محشر کا تماشا بھی یہیں چاہتے ہیں؟

وہ جو کھڑکی میں اُسی طرح جلاتے ہیں چراغ

اس کا مطلب ہے ہمیں پردہ نشیں چاہتے ہیں

کون وعدوں پہ جیے حشر تلک، ظلم سہے

تیرے بندے، تیرا انصاف یہیں چاہتے ہیں

اتنی اونچی ہے کہ اب بیل کا دَم گُھٹتا ہے

جانے دیوار سے کیا گھر کے مکیں چاہتے ہیں

ممتاز گورمانی