فصلِ رسن و دار میں آ ہم نے سُنا ہے
پیغام تِرا زُلف رسا، ہم نے سنا ہے
رنگیں نظر آتے ہیں تِرے کُوچہ و بازار
گُزرا ہے کوئی آبلہ پا ہم نے سنا ہے
کیا بات ہے اس کُوچۂ دلدار کی یارو
پِھرتی ہے کئی دن سے صبا ہم نے سنا ہے
دیکھی ہے تِرے عارضِ گُلرنگ میں بجلی
کہتے تِری زُلفوں کو گھٹا ہم نے سنا ہے
یہ رنگ، یہ خُوشبو، یہ چمکتی ہوئی راہیں
ٹُوٹا ہے کوئی بندِ قبا، ہم نے سُنا ہے
دلکش جو کہیں بھی تو کہیں کس سے غمِ دل
اپنا تو صنم ہے نہ خُدا، ہم نے سنا ہے
دلکش ساگری
No comments:
Post a Comment