بلا عنوان افسانہ کہے گا تم بھی سن لینا

 بِلا عُنوان افسانہ کہے گا تم بھی سُن لینا

خِرد کی بات دیوانہ کہے گا تم بھی سن لینا

رموزِ عشق دیوانہ کہے گا تم بھی سن لینا

وہ کعبہ کو صنم خانہ کہے گا تم بھی سن لینا

دلِ غم آشنا جب تنگ آ کر زندگانی سے

شبِ فُرقت کا افسانہ کہے گا تم بھی سن لینا

فِدا کیوں جان کر دیتا ہے بڑھ کر شمعِ محفل پر

کبھی یہ راز پروانہ کہے گا تم بھی سن لینا

جو بہکی بہکی باتوں سے محبت میں نہ باز آئے

تو عالم تم کو دیوانہ کہے گا تم بھی سن لینا

بہت سے راز اس سے گُلستاں کے مُنکشف ہوں گے

اک ایسی بات وِیرانہ کہے گا تم بھی سن لینا

نہ بھُولیں گے قیامت تک بھی اربابِ چمن جن کو

وہ باطن آج دیوانہ کہے گا تم بھی سن لینا

یہ ہونے کو تو دیوانہ ہے لیکن راز کی باتیں

با اندازِ کلیمانہ کہے گا تم بھی سن لینا

ابھی کیا ہے ابھی ہر ایک ساتھی ظُلم کی باتیں

با انداز رفیقانہ کہے گا تم بھی سن لینا

یہی رِند زیادہ نوش غریق بے خودی ہو کر

ابھی شیشے کو پیمانہ کہے گا تم بھی سن لینا

رضی! میرا مذاق عاشقی جس نے اُڑایا ہے

وہی اب اپنا دیوانہ کہے گا تم بھی سن لینا

رضی بدایونی

مولوی رضی احمد