بادل بارش سرد ہوائیں میں اور تو

 بادل بارش سرد ہوائیں میں اور تُو

کالی اور گھنگھور گھٹائیں میں اور تو

نفرت سے بے نور ہوئے اس عالم میں

چاہت کی انمول ضیائیں میں اور تو

تُو مجھ سے میں تجھ سے لے لوں غم تیرے

اک دُوجے کی کریں دُعائیں میں اور تو

اپنے اپنے دل میں لے کر بیٹھے ہیں

بے مہر و بے درد انائیں میں اور تو

ہر سُو کر دیں پیار کے ہم مینار کھڑے

نفرت کی دیوار گرائیں میں اور تو

سب ہیں بے حِس، بے اعتماد جمال یہاں

کس کو اپنا حال سُنائیں میں اور تو

جمال عبدالناصر