رقیب جاں نظر کا نور ہو جائے تو کیا کیجے

 رقیبِ جاں نظر کا نُور ہو جائے تو کیا کیجے

زیاں دل کو اگر منظور ہو جائے تو کیا کیجے

وفا کرنے سے وہ مجبور ہو جائے تو کیا کیجے

محبت رُوح کا ناسُور ہو جائے تو کیا کیجے

وہی چرچے وہی قصے ملی رُسوائیاں ہم کو

انہی قصوں سے وہ مشہور ہو جائے تو کیا کیجے

زمانے سے گِلہ کیسا جب اپنے جسم کا سایہ

اندھیرے میں ہمیں سے دُور ہو جائے تو کیا کیجے

خدا کو اتنا چاہوں تو خدا ہو جائے گا راضی

مگر وہ اور بھی مغرور ہو جائے تو کیا کیجے

منور جس کے دم سے تھی ہماری زندگی میتا

وہی ماہتاب گر مستور ہو جائے تو کیا کیجے

امیتا پرسورام میتا