کتنا فرق ہو گا
تم سُہاگ کے بستر پر فتح مندی سے چُور ہو جاؤ گے
اپنا جھنڈا گاڑو گے
بے خبر سو جاؤ گے
اور میں
میرے ہاتھ ٹھنڈے رہیں گے
اور دل کانپتا رہے گا
میں کبھی نادم ہوں گی اور کبھی خوفزدہ
میں صبح تک خود سے لڑتی رہوں گی
کیونکہ میں
میں وہ ہوں
جس میں تم نو ماہ ٹھہرتے ہو
جس نے پہلے پہل تمہیں بیج بونا سکھایا
بے وقعت، بے مول
کُچلی ہوئی پالک
لیکن اب وہ ہوں
جو تمہارے بچے کُچھے حصوں سے بنی ہوں
میں ہوں
جو تمہیں ممنوعہ کی ترغیب دیتی ہوں
اسی لیے زنجیروں سے بندھی ہوں
میں نجس ہوں، گھٹیا ہوں، غلیظ ہوں
بے وقعت، بے مول، کُچلی ہوئی
لیکن سرُور و لُطف کا کوئی بھی لمحہ میرے بِنا ادھُورا کیوں ہے؟
تم پیدائش کے لیے میرے محتاج کیوں ہو؟
تمہارے بنائے قید خانوں کی آشتی میرے بِنا مکمل کیوں نہیں؟
تمہارے بچے میری ناپاک چھاتیوں کے لیے کیوں بِلکتے ہیں؟
میرے بِنا مصوروں کے رنگ
اور گِیتوں کے انگ اتنے پھیکے کیوں ہیں؟
تو پھر بتاؤ
سُہاگ کی رات
تم فاتح اور میں مفتوح کیوں ہیں؟
ڈاکٹر صنوبر الطاف
No comments:
Post a Comment