دردِ تنہائی الگ ہے شادمانی ہے الگ
میرا قِصہ اور ہے ان کی کہانی ہے الگ
ایک ہے موسم خزاں کا ایک ہے فصلِ بہار
دورِ پِیری ہے الگ عہدِ جوانی ہے الگ
جامِ صہبا میں کہاں ایسا مزا ہے ساقیا
تیری آنکھوں کی شرابِ ارغوانی ہے الگ
حشر میں پیشِ خُدا کُھلتے ہیں سب عیب و ہُنر
دُودھ کا دُودھ اور ہے پانی کا پانی ہے الگ
وہ ہے میدانِ جزا، یہ آزمائش کی جگہ
دارِ عُقبیٰ اور ہے دُنیائے فانی ہے الگ
حُکم کا سِکہ چلانا ملک میں ہے اور بات
ملک والوں کے دِلوں پر حکمرانی ہے الگ
لُوٹتے ہیں باغباں کرتے ہیں رکھوالی کہاں
دورِ حاضر میں طریقِ باغبانی ہے الگ
وہ دِلوں کو توڑتی ہے، یہ مِلاتی ہے انہیں
تلخ گوئی ہے الگ، شِیریں زبانی ہے الگ
لُطف سے عاری سہی دِل موہ لیتی ہے ضرور
ہے الگ برتر تمہاری شعر خوانی ہے الگ
برتر مدراسی
محمد عبدالمناف برتر
No comments:
Post a Comment