زندگی تو اتنی بے رحم تو نہ تھی

 زندگی

زندگی

تُو اتنی بے رحم تو نہ تھی

جب میں نومولود تھی

جب پیر کے تلووں کو

زمین پہ رکھنا

اور رکھ کر سنبھلنا سیکھا تھا

تیری بے رحمی کا اندازہ 

مجھے تب بھی نہ ہوا

جب مجھے پردیس جانے کے لیے تیار کیا گیا

جب مجھے غیروں میں بھیجنے کی تیاری کی گئی

تیری بے رحمی پہ 

اس وقت بہت روئی

جب مجھے اپنوں نے چھوڑ دیا

اس نامعلوم گُمشدہ احساس کے ساتھ

اس نادان شرمندہ احساس کے ساتھ

تیری بے رحمی کا احساس مجھے تب ہو گیا تھا

جب میرے کاندھوں پہ بچپن میں ہی بوجھ لاد دیا تھا

جیسے کلی کِھلنے کے بعد

اس احساس سے ہی مُرجھا جاتی ہے

کہ اس کی خوبصورتی

دوسروں کے لیے ہے

کہ اسے توڑ دیا جائے گا

کہ وہ اپاہج ہے

محتاج ہے

نہ بے ساکھی ہے

نہ سہارا

پر زندگی تو یہ نہیں جانتی

کہ تُو نے ایک وبا کو پیدا کردیا ہے

جو کہ میری تدفین کے وقت

زمین میں بس گئی ہے

پر میں نے

اسے دفن ہونے سے بچا لیا ہے

گر یہ تجھے لگ گئی 

تو  تیری آنکھوں سے خون بہنے لگے گا

تیرے بال تجھے جنگل کی طرف گھسیٹ کر لے جائیں گے

اور تجھے ان پیڑوں سے باندھ دیں گے

جن کی جڑیں آسمانوں کی طرف ہیں

تیرے ناخن تیرے جسم کو لپیٹ لیں گے

اُلٹے پیر اور اُلٹے منہ والے کُتے

اپنی زبانوں سے تیرے جسم کو گِیلا کریں گے

وہ وبا زمین کے ہر کونے سے نکل کر

آسمان کے سنگھوں کی طرف رواں ہے

وہ کونے جو تُو نے کبھی دریافت نہ کیے

وہ کونے جن کے ہر سوراخ میں

تیرے ذرے موجود ہیں

پر تُو بے خبر رہی

سمندر بھر مٹی

جو کہ بیلچہ میں پڑی ہے

تیری شکست کا اشارہ کر رہی ہے

کرن رباب