کچھ اور ہے مجھ کو غم دوراں تو نہیں ہے
مضطر ہے دل شوق پریشاں تو نہیں ہے
لٹنے کی تمنا ہے مِرے گوہر دل میں
مفلس تو نہیں بے سر و ساماں تو نہیں ہے
کل ہو گی قیامت وہ یقیں بھی نہیں کرتا
ظالم کوئی کافر ہے مسلماں تو نہیں ہے
کیا ہے جو کھٹکتا ہے برابر مِرے دل میں
مجھ پر نگہ ناز کا احساں تو نہیں ہے
اٹھتا ہے جو شعلہ سا مِرے قلب و جگر میں
برق شرف طور فروزاں تو نہیں ہے
راضی کو اجازت نہیں کیوں بزمِ طرب میں
یہ آپ کی محفل ہے شبستاں تو نہیں ہے
خلیل راضی
No comments:
Post a Comment