خواب قربان کیا ہے میں نے

 خواب قُربان کِیا ہے میں نے 

خُود کو وِیران کیا ہے میں نے 

کچھ بھی باقی نہ بچا اپنے لیے

جب بھی مِیزان کیا ہے میں نے 

عشق کی راہ میں  چلتے چلتے

اپنا نُقصان کیا ہے میں نے

ایک دِیوار گِرانے کے لیے 

جسم بے جان کیا ہے میں نے

زندہ رکھا ہے تغزل اپنا

گُل کو گُلدان کیا ہے میں نے

حضرتِ قیس کے قِصے لِکھ کر 

شہر سُنسان کیا ہے میں نے

اپنے ہمزاد  سے لڑتے لڑتے

خود کو ہلکان کیا ہے میں نے

بے ہُنر مجھ کو جو کہتے تھے رشید 

ان کو حیران کیا ہے میں نے

رشید سندیلوی