در و دیوار پہ صدیوں کا اثر لگتا ہے
گھر میں کوئی نہیں ہوتا ہے تو ڈر لگتا ہے
سوتی اور جاگتی کرنیں ہیں مِری آنکھوں میں
ایک جیسا ہی مجھے شام و سحر لگتا ہے
کوئی آساں تو نہیں درد کی منزل پانا
دل کی ہر بات میں پتھر کا جگر لگتا ہے
پھول سب ایک سے دلکش نہیں ہوتے لیکن
اس کی زلفوں میں ہر اک پھول مگر لگتا ہے
ورنہ اک بوجھ سی لگتی ہے تلاش منزل
ہمسفر ساتھ اگر ہو تو سفر لگتا ہے
جس پہ سو جاتے ہیں معصوم پرندے ثروت
بس وہی پیڑ درختوں میں شجر لگتا ہے
ثروت زیدی بھوپالی
No comments:
Post a Comment